15. Боянъ же братие не 10 соколовь на стадо лебедѣй пущаще
нъ своя вѣщиа пръсты на живая струны въскладаше
они же сами княземъ славу рокотаху
18. почнемъ же братие повѣсть сию
от стараго Владимера до нынѣшняго Игоря
иже истягну умь крѣпостию своею
и поостри сердца своего мужествомъ
наплънився ратного духа наведе своя храбрыя плъкы
на землю Половѣцькую за землю Руськую
35.о Бояне соловию стараго времени
абы ты сиа плъкы ущекоталъ
скача славим по мыслену древу
летая умомъ подъ облакы
свивая оба полы сего времени
рища въ тропу Трояню чресъ поля на горы
41. пѣти было пѣснь Игореви того внуку
не буря соколы занесе чрезъ поля широкая
галицы стады бѣжать к Дону великому
чи ли въспѣти было вѣщей Бояне Велесовь внуче
45. комони ржуть за Сулою звенить слава в Кыевѣ
трубы трубять въ Новѣградѣ стоять стязи въ Путивлѣ
Игорь ждетъ мила брата Всеволода
43. и рече ему буй туръ Всеволодъ
одинъ братъ одинъ свѣтъ свѣтлый ты Игорю
оба есвѣ Святъславличя
сѣдлай брате свои бръзыи комони
а мои ти готови осѣдлани у Курьска напереди
а мои ти куряни свѣдоми къмети
подъ трубами повити подъ шеломы възлѣлѣяни
конець копия въскръмлени
пути имь вѣдоми яругы имь знаеми
луци у них напряжени тули отворени сабли изъострени
сами скачють акы сѣрыи влъци въ поле
ищучи себе чти а князю славѣ
70. крычатъ тѣлѣгы полунощы рци лебеди роспужени
Игорь къ Дону вой ведетъ
уже бо бѣды его пасеть птиць по дубию
влъци грозу въсрожатъ по яругамъ
орли клекотомъ на кости звѣри зовутъ
лисицы брешутъ на чръленыя щиты
о Руская земле уже за шеломянемъ еси
77. длъго ночь мрькнетъ заря свѣтъ запала мъгла поля покрыла
щекоть славий успе говоръ галичь убуди
русичи великие поля чрьлеными щиты прегородиша
ищучи себѣ чти а князю славы
81. съ зарания въ пятокъ потопташа поганыя плъкы половецкыя
и рассушясь стрѣлами по полю
помчаша красныя дѣвки половецкыя
а съ ними злато и паволокы и драгыя оксамиты
85. орьтъмы и япончицы и кожухы
87. и всякыя узорочья половѣцкыя
чрьленъ стягъ бѣла хорюговь чрьлена чолка сребрено стружие
89. храброму Святъславличю
69. а половци неготовами дорогами побегоша к Дону великому
86. начашя мосты мостити по болотомъ и грязливымъ местомъ
24. тогда Игорь възрѣ на свѣтлое солнце
и видѣ отъ него тьмою вся своя воя прикрыты
и рече Игорь къ дружинѣ своей
братие и дружино луце жъ бы потяту быти неже полонену быти
а всядемъ братие на свои бръзыя комони да позримъ синего Дону
30. спалъ князю умь похоти и жалость ему знамение заступи
искусити Дону великого
хощу бо рече копие приломити конец поля Половецкого
съ вами русици хощу главу свою приложити
34. а любо испити шеломомь Дону
60. тогда въступи Игорь князь въ златъ стремень
и поѣха по чистому полю
солнце ему тъмою путь заступаше
нощь стонущи ему грозою
птичь убуди свисть звѣринъ въста
збися дивъ кличетъ връху древа
велитъ послушати земли незнаемѣ
Влъзѣ и Поморию и Посулию и Сурожу и Корсуню
68. и тебѣ Тьмутороканьскый блъван
90. дремлетъ въ полѣ Ольгово хороброе гнѣздо далече залетѣло
не было оно обидѣ порождено ни соколу ни кречету
ни тебѣ чръный воронъ поганый половчине
Гзакъ бежитъ сѣрымъ влъкомъ
Кончакъ ему слѣдъ править къ Дону великому
95. другаго дни велми рано кровавыя зори свьтъ повѣдаютъ
чръныя тучя съ моря идутъ
хотятъ прикрыти 4 солнца
а въ нихъ трепещутьсинии млънии юыти грому великому
итти дождю стрѣламисъ Дону великаго
ту ся копиемъ приламати ту ся саблямъ потручяти
о шеломы половецкыя на реце на Каялѣу Дону великаго
о Руская землѣ уже за шеломянемъ еси
103.се вѣтри Стрибожи внуци вѣютъ съ моря стрѣлами
на храбрыя плъкы Игоревы
земля тутнетъ рѣкы мутно текуть пороси поля прикрываютъ
стязи глаголютъ половци идуть
отъ Дона и отъ моря и отъ всѣхъ странъ
рускыя плъкы отступиша
дѣти бѣсови кликомъ поля прегородиша
а храбрии русици преградиша чрълеными щиты
111. яръ туре Всеволодѣ стоиши на борони
прыщеши на вой стрѣлами
гремлеши о шеломы мечи харалужными
камо туръ поскочяше своимъ златымъ шеломомъ посвѣчивая
тамо лежатъ поганыя головы половецкыя
поскепаны саблями калеными шеломы оварьскыя от тебе
117. яръ туре Всеволоде кая раны дорога братие
забывъ чти и живота
и града Чрънигова отня злата стола
и своя милыя хоти красныя Глѣбовны свычая и обычая
121. были вѣчи Трояни минула льта Ярославля
были плъци Слговы Ольга Святославличя
тъй бо Олегъ мечемъ крамолу коваше и стрелы по земли сѣяше
ступаетъ въ златъ стремень в градѣ Тьмутороканѣ
той же звон слыша давный великый Ярославь
а сынъ Всеволожь Владимиръ по вся утра уши закладаше въ Черниговѣ
Бориса же Вячеславлича слава на судъ приведе
и на Канину зелену паполому постла
за обиду Олгову храбра и млада князя
съ тоя же Каялы Святоплъкь повелѣ яти отца своего
междю угорьскими иноходьцы ко святѣй Софии къ Киеву
тогда при Олзѣ Гориславличи сѣяшется и растяшеть усобицами
погибашеть жизнь Даждьбожа внука
въ княжихъ крамолахъ вѣци человѣкомь скратишась
тогда по Руской земли рѣтко ратаевѣ кикахуть
нъ часто врани граяхуть трупиа себѣ дѣляче
а галици свою рѣчь говоряхуть хотять полетѣти на уедне
то было въ ты рати и въ ты плъкы а сицей рати не слышано
140. тсъ зараниа до вечера съ вечера до свѣта
летять стрѣлы каленыя гримлютъ сабли о шеломы
трещатъ копиа харалужныя в полѣ незнаемѣ
среди земли Половецкыи чръна земля подъ копыты
костьми была посѣяна а кровью польяна
тугою взыдоша по Руской земли
146.что ми шумить что ми звенить далече рано предъ зорями
Игорь плъкы заворочаетъ жаль бо ему мила брата Всеволода
бишася день бишася другый
третьего дни къ полуднию падоша стязи Игоревы
150. ту ся брата разлучиста на брезѣ быстрой Каялы
ту кровавого вина не доста
ту пир докончаша храбрии русичи
сваты попоиша а сами полегоша за землю Рускую
154. ничить трава жалощами а древо с тугою къ земли преклонилось
уже бо братие не веселая година въстала
уже пустыни силу прикрыла
въстала обида въ силахъ Дажьбожа внука
вступила дѣвою на землю Трояню
въсплескала лебедиными крылы на синѣмъмореуДону плещучи
160. упуди жирня времена усобица князем на поганыя погибе
рекоста бо братъ брату се мое а то моеже
и начяша князи про малое се великое млъвити
а сами на себѣ крамолу ковати
а погании съ всѣхъ странъ прихождаху съ побьдами на землю Рускую
165. о далече зайде соколъ птиць бья къ морю
а Игорева храброго плъку не крѣсити
за нимъ кликну Карна и Жля поскочи по Руской земли
смагу людемъ мычючи въ пламянѣ розѣ
жены руския въсплакашась аркучи
уже намъ своихъ милыхъ ладъ ни мыслим мыслити
ни думою сдумати ни очима съглядати
172. а злата и сребра ни мало того потрепати
173. а въстона бо братие Киевъ тугою а Черниговъ напастьми
тоска разлияся по Руской земли
печаль жирна тече средь земли Рускыи
176. а князи сами на себе крамолу коваху
а погании сами побѣдами нарищуще на Рускую землю
емляху дань по бѣлѣ отъ двора
179. тии бо два храбрая Святъславлича Игорь и Всеволодъ
уже лжу убудиста которою ту бяше успилъ отецъ ихъ
Святъславь грозный великый киевскый грозою бяшеть
притрепалъ своими сильными плъкы и харалужными мечи
наступи на землю Половецкую притопта хлъми и яругы
взмути рѣки и озеры иссуши потоки и болота
а поганаго Кобяка изъ Лукуморя
отъ желѣзныхъ великыхъ плъковъ половецкыхъ яко вихрь выторже
и падеся Кобякъ въ градѣ Киевѣ въ гридницѣ Святъславли
ту нѣмци и венедици ту греци и морава поютъ славу Святъславлю
кають князя Игоря иже погрузи жиръ
во днѣ Каялы рѣки половецкыя рускаго злата насыпаша
ту Игорь князь высѣдѣ изъ сѣдла злата а въ сѣдло кощиево
уныша бо градомъ забралы а веселие пониче
193. а Святъславь мутенъ сонъ видѣ въ Киевѣ на горахъ
си ночь съ вечера одѣвахуть мя рече
чръною паполомою на кроваты тисовѣ
чръпахуть ми синее вино съ трудомъ смѣшено
сыпахуть ми тъщими тулы поганыхъ тльковинъ
великый женчюгь на лоно и нѣгуютъ мя
уже дьскы безъ кнѣса в моемъ теремѣ златовръсѣмъ
всю нощь съ вечера бусови врани възграяху у Плѣсньска
на болони бѣша дебрь Кияня и несошася къ синему морю
202. и ркоша бояре князю уже княже туга умь полонила
се бо два сокола слѣтѣста съ отня стола злата
поискати града Тьмутороканя любо испити шеломомь Дону
уже соколома крильца припѣшали поганыхъ саблями
а самаю опуташа въ путины желѣзны
темно бо бѣ въ 3 день два солнца помѣркоста
оба багряная стлъпа погастоста
и съ нима молодая мѣсяца Олегъ и Святъславъ
тъмою ся поволокоста и въ морѣ погрузиста
и великое буйство подаста хинови
212. на рѣцѣ на Каялѣ тьма свѣтъ покрыла
по Руской земли прострашася половци акя пардуже гнѣздо
уже снесеся хула на хвалу
уже тресну нужда на волю
уже връжеса дивь на землю
се бо готьскыя красныя дѣвы въспеша
на брезѣ синему морю звоня рускымъ златомъ
поютъ время Бусово лелѣютъ месть Шароканю
а муже дружина жадни веселия
221. тогда великый Святъславъ изрони злато слово с слезами смѣшено
и рече о моя сыновчя Игорю и Всеволоде
рано еста начала Половецкую землю мечи цвѣлити а себѣ славы искати
нъ нечестно одолѣсте нечестно бо кровь поганую пролиясте
ваю храбрая сердца въ жестоцемъ харалузѣ скована а в буести закалена
се ли створисте моей сребреней сѣдинѣ
227. а уже не вижду власти сильнаго и богатого и многовоя брата моего Ярослава
съ черниговьскими былями съ могуты и съ татраны и съ шельбиры
и съ топчакы и съ ревугы и съ ольберы
тии бо бес щитовь съ засапожникы кликомъ плъкы побѣждаютъ
звонячи въ прадѣднюю славу нъ рекосте мужаимѣся сами
преднюю славу сами похитимъ а заднюю си сами подѣлимъ
а чи диво ся братие стару помолодити
коли соколъ въ мытехъ бываетъ высоко птицъ възбиваетъ
не дастъ гнѣзда своего въ обиду
нъ се зло княже ми непособие наниче ся годины обратиша
се у Римъ кричатъ подъ саблями половецкыми
а Володимиръподъ ранами
туга и тоскасыну Глѣбову
240. Великый княже Всеволоде
не мыслию ти прелетѣти издалеча отня злата стола поблюсти
ты бо можеши Волгу веслы раскрѣпитиа Донъшеломывыльяти
аже бы ты былъ то была бы чага по ногатѣ а кощей по резанѣ
ты бо можеши посуху живыми шереширы стрѣляти
удалыми сыны Глебовы
246. ты буй Рюриче и Давыде
не ваю ли вой злачеными шеломы по крови плаваша
не ваю ли храбрая дружина рыкаютъ акы тури
ранены саблями калеными на полѣ незнаемѣ
вступита господина въ злата стремень за обиду сего времени
за землю Рускую за раны Игоревы буего Святъславлича
252.галичкы Осмомыслѣ Ярославе
высоко сѣдиши на своемъ златокованнѣмь столѣ
подперъ горы Угорскыи своими жеяѣзными плъки
заступивъ королеви путь затворивъ Дунаю ворота
меча бремены чрезъ облакы
суды рядя до Дуная
258. грозы твои по землямъ текутъ
отворяеши Киеву врата
стрѣляеши съ отня злата стола салътани за землями
стрѣляй господине Кончака поганого Кащея
за землю Рускую за раны Игоревы буего Святъславлича
283. а ты буй Романе и Мстиславе
храбрая мысль носитъ вашъ умъ на дѣло
высоко плаваеши на дѣло въ буести
яко сокол на вѣтрехъ ширяяся
хотя птицю въ буйствѣ одолѣти
288. суть бо у ваю желѣзныи паропци подъ шеломы латиньскыми
тѣми тресну земля и многы страны
Хинова Литва Ятвязи Деремела и Половци
сулици своя повръгоша а главы своя подклониша
подъ тыи мечи харалужныи
273. нъ уже княже Игорю утръпѣ солнцю свѣтъ
а древо не бологомъ листвие срони
по Реи и по Сули града подѣлиша
а Игорева храброго плъку не крѣсити
Дон ти княже кличетъ и зоветъ князи на побѣду
Олговичи храбрый князи доспѣли на брань
279. Инъгварь и Всеволоды и вси три Мстиславичи
не худа гнѣзда шестокрилци
не побѣдными жребии собѣ власти расхытисте
кое ваши златыи шеломы и сулицы ляцкыи и щиты
загородите полю ворота своими острыми стрѣлами
за землю Рускую за раны Игоревы буего Святъелавлича
285. уже бо Сула не течетъ сребреными струями къ граду Переяславлю
и Двина болотомъ течетъ онымъ грознымъ полочаномъ
подъ кликомъ поганыхъ един же Изяславъ сын Васильковы
позвони своими острыми мечи о шеломы литовьекыя
притрепа славу дѣду своему Всеславу
а сам подъ чрълеными щиты на кровавѣ травѣ притрепаны литовекыми мечи
291. и се хоти юна о крови тъи рече
дружину твою княже птиць крилы приодѣ а звѣри кровь полизаша
не бысть ту брата Брячяслава ни другаго Всеволода
едины же изрони жемчюжну душу изъ храбра тѣла чресъ злато ожерелие
уныли голоси пониче веселие трубы трубятъ городеньскии
298. Ярославе и вси внуце Всеславли
уже понизите стязи свои вонзите свои мечи вережени
уже бо выскочисте изъ дѣдней славѣ вы бо своими крамолами
начясте наводити поганыя на землю Рускую
на жизнь Всеславлю которою бо бѣше насилие отъ земли Половецкыи
301. на седьмом вѣцѣ Трояни връже Всеславъ жребий о дѣвицю себѣ любу
тъй клюками подпръ ся о кони и скочи къ граду Кыеву
и дотчеся стружиемъ злата стола киевьскаго
скачи отъ нихъ лштымъ звѣремъ въ плъночи изъ Бѣлаграда
обѣсися синѣ мьглѣ утръже вазни сотри кусы отвори врата Новуграду
разшибе славу Ярославу скочи влъкомъ до Немиги съ Дудутокъ
на Немизѣ снопы стелютъ головами молотятъ чепи харалужными
на тоцѣ живот кладутъ вѣютъ душу отъ тѣла Немизѣ кровави брезѣ
не бологомъ бяхуть посѣяни посѣяни костьми рускихъ сыновъ
310. Всеславъ князь людемъ судяше княземъ грады рядяше
а самъ въ ночь влъкомъ рыскаше
из Кыева дорискаше до куръ Тмутороканя великому Хръсови влъкомъ путь прерыскаше
тому въ Полотьскѣ позвониша заутренюю у Святыя Софеи въ колоколы
а онъ въ Кыевѣ звонъ слыша
аше и вѣща душа въ дръзѣ тѣлѣ нъ часто бѣды страдаше
тому вѣшей Боянъ и пръвое припѣвку смысленый рече
ни хытру ни горазду ни птицю горазду суда божиа не минути
319. о стонати Руской земли помянувше пръвую годину и пръвыхъ князей
того стараго Владимира нельзѣ бѣ пригвоздити къ горамъ киевьскымъ
сего бо нынѣ сташа стязи Рюриковы а друзии Давидовы
нъ розно ся имъ хоботы пашутъ копиа поютъ
323. на Дунай Ярославнынъ гласъ ся слышить
зегзицею незнаема рано кычеть
полечю рече зегзицею по Дунаеви
омочю бебрянъ рукавъ въ Каялѣ рѣцѣ
утру князю кровавыя его раны на жестоцѣмъ его тѣлѣ
328. Ярославна рано плачетъ въ Путивлѣ на забралѣ
аркучи о вѣтрѣ вѣтрило чему господине насильно вѣеши
чему мычеши хиновьскыя стрѣлки на своею нетрудною крилцю на моея лады вои
мало ли ти бяшетъ горѣ подъ облакы вѣяти лелѣючи корабли на синѣ морѣ
чему господине мое веселие по ковылию развѣя
333. Ярославна рано плачеть Путивлю городу на заборолѣ аркучи
о Днепре Словутицю ты пробилъ еси каменныя горы течеши сквозѣ землю Половецкую
ты лелѣял еси на себѣ Святославли носады до плъку Кобякова
възлелѣй господине мою ладу къ мнѣ
а быхъ не слала къ нему слезъ на море рано
338. Ярославна рано плачетъ въ Путивлѣ на забралѣ аркучи
свѣтлое и тресвѣтлое слънце всѣмъ тепло и красно еси
чему господине простре горячюю свою лучю на ладѣ вои
въ полѣ безводнѣ жаждею имѣ лучи съпряже тугою имъ тули затче
342. прысну море полунощи идуть сморци мьглами
Игореви князю богъ путь кажетъ изъ земли Половецкой
на землю Рускую къ отню злату столу
345. погасоша вечеру зори
Игорь спитъ Игорь бдитъ Игорь мыслию поля мѣритъ
отъ великаго Дону до малого Донца комонь
въ полуночи Овлуръ свисну за рѣкою
велить князю разумѣти князи Игорю не быть
кликну стукну земля въшумѣ трава вежи ся подвизашася
351. а Игорь князь поскочи горностаемъ къ тростию
и бѣлымъ гоголемъ на воду
въръжеся на бръзъ комонь и скочи съ него бусымъ влъкомъ
и потече къ лугу Донца и полетѣ соколомъ подъ мъглами
избивая гуси и лебеди завтроку и обѣду и ужинѣ
коли Игорь соколомъ полетѣ тогда Влуръ влъкомъ потече
труся собою студеную росу претръгоста бо своя бръзая комоня
358. Донецъ рече княже Игорю
не мало ти величия а Кончаку нелюбия а Руской земли веселиа
Игорь рече о Донче не мало ти величия лелѣявшу князя на влънахъ
стлавшу ему зелѣну траву на своихъ сребреныхъ брезѣхъ
одѣвашу его теплыми мъглами подъ сѣнию зелену древу
стрежаше его гоголемъ на водѣ чабцами на струяхъ чрьнядьми на ветрѣхъ
364. не тако ти рече рѣка Стугна худу струю имѣя
пожръши чужи ручьи и стругы рострена къ устью
уношу князю Ростиславу затвори
Днѣпрь темнѣ березѣ плачется мати Ростиславля
по уноши князи Ростиславѣ
уныша цвѣты жалобою и древо с тугою къ земли прѣклонилось
370. а не сорокы втроскоташа на слѣду Игоревѣ
ѣздитъ Гзакъ съ Кончакомъ
тогда врани на граахуть галици помлъкоша
сорокы не троскоташа полозие ползаша только
дятлове тектомъ путь къ рѣцѣ кажутъ
соловии веселыми пѣсньми свѣтъ повѣдаютъ
376. млъвитъ Гзакъ Кончакови аже соколъ къ гнѣзду летитъ
соколича рострѣляевѣ своими злачеными стрѣлами
рече Кончакъ ко Гзѣ аже соколъ къ гнѣзду летитъ
а вь соколца опутаевѣ красною дѣвицею
и рече Гзакъ къ Кончакови аще его опутаевѣ красною дѣвицею
ни нама будетъ сокольца ни нама красны дѣвице
то почнутъ наю птици бити въ полѣ Половецкомъ
383. рекъ Боянь и Ходына
Святъславля пѣснотворца старого времени Ярославля
Ольгова коганя хоти
тяжко ти головы кромѣ плечю зло ти тѣлу кромѣ головы
Руской земли безъ Игоря
338. солнце светится на небесѣ
Игорь князь въ Руской земли
дѣвици поютъ на Дунай вьются голоси чрезъ море до Киева
Игорь ѣдетъ по Боричеву къ святѣй богородици Пирогощей
страны ради гради весели
393. пѣвше пѣснь старымъ княземъ а потомъ молодымъ пѣти
слава Игорю Святъславличю буй туру Всеволоду Владимиру Игоревичу
здрави князи и дружина побарая за христьяны на поганыя плъки
княземъ слава а дружинѣ аминь
